نه‌دن ۱۴۰۱ شهریور قیامی نین ایلدونوموینده فارس فاشیست گروپلارینین چاغیرشلارینا قاتیلامامالییق

اومود  دوْزگوْن

 

 موْراجیعت:

عزیز هموطنلر

کئچن ایلده باش وئره ن بؤیوک اعتیراضلارین ایلدؤنومو عرفه سینده ییک. قادینلارین اؤنجوللوکو ایله ایران آدلی اؤلکه‌ده یاشایان بوتون میلّتلرین اوْ ج‍ۆمله‌دن گۆنئی آزربایجان تۆرک میلّتی‌نین ایشتیراکی ایله فارس فاشیست رئژیمینه قارشی عۇصیان و قیامین شاهیدی اوْلموشدوق. بیر حالدا کی، بو قیام گئدیردی اینقیلابلا چئوریله، تاسفله بیر طرفدن قدّار رئژیمین وحشیجه‌سینه باسقیلاری و اوْ بیری طرفدن فارس فاشیست تفکورلو اوْپوزیسییون و باشدا سلطنتچیلر، رضا پهلوی‌نین تخریب کارئکتئرلی داورانیشلاری و قیامی اؤز آدینا مُصادیره ائتمه‌سی، باعث اوْلدو میلّتلرین و سیاسی قۇروپلارین آراسیندا ایختیلافلار و تضادلار اوْرتایا چؽخیب نئچه دسته‌لیک یارانا؛ بونونلا دا رئژیم باجاردی بیر نئچه آیین ایچینده بو قیامی قانا چکیب دایاندیرا.

 بو قیامدا گۆنئی آزربایجان میلّتی‌نین پایی چوخ اوْلماسایدی دا،  آز دا دئییلدی. اوْنلار شهید، یارالی و یوزلرجه تۇتولانلاریمیز اوْلموشدو.

فارس فاشیست و شعوبیه چی تفکورلو مئدیالار، آزربایجان میلّی حرکتی‌نین گۆجوندن و مۆستقیل حرکت ائتمه‌سی و فارس فاشیست اوْپوزیسییون قۇروپلاری‌نین چتری‌نین آلتینا گئتمه‌مه‌سی قورخوسوندان، آزربایجان تۆرکلرینه عاید اوْلان تظاهوراتلارین خبرلرینی بایکوت ویا تحریف ائدیب اؤز آدلارینا یازیب منیمسه‌ییردیلر. بیزیم رشادتلی شهیدلریمیزین مظلوملوغونو کؤلگه آلتینا سالمالاری بیر داها گؤستردی کی، فارس فاشیست رئژیمی  و اوپوزیسییونونو مۆشترک بیر نۆقطه‌ده بیرلشیرلر، او دا تورکلرله دوشمنچیلیکلری دیر.

گورونور میلّی منافع و میلّی ماراقلارا گلنده تۆرکلر له فارسلارین تضادلی منافع و مقصدلری واردیر. چۆنکو بیز تکجه رئژیم دَییشمک یوْخ، بلکه هم رئژیم دَییشمک و هم ده ۱۰۰ ایللیک فارس فاشیست سیستمینی دَییشمک ایسته‌ییریک. اوْنا گؤره  ده اؽران آدلانان اؤلکه‌ده آزربایجان تۆرک میلّتی‌نین قارشی‌سیندا دۇران یالنیز رئژیم یوْخ، بلکه فارس اوْپوزیسییونی و بۆتؤولوکده اؽران مرکزلی فارس-شعوبیه چی تفکور و سیستمی دایانیر. بو عیرقچی- فاشیستی تفکور؛ « آزربایجان مرکزلی تۆرک دۆشونجه سیستئمی» ایله تضاددا دیر.

بو آرادا بعضی آسسیمیلاسییا تأثیری آلتیندا قالان ایران مرکزلی دۆشونن؛ آزربایجان کؤکنلی، اوزونو ایران-جانجانی بیلن جاهیل‌لر و مانقورتلار وار کی، سوْلچی آدینا جاهان وطنی و ساغچی آدینا ایران وطنی، آزربایجان وطن آنلاییشینی درک ائتمه ینلر، میلّی حرکتیمیزین ایچینه سیزمیشلار. 

 گاه فئدرالیسم آدینا، گاه ایران تورک ائلی آدینا، گاهدا رئیال پوْلوتیک آدینا، آزربایجان تۆرک میلّتی‌نین آند ایچمیش دۆشمانلاری اوْلان سلطنت-طلبلر، تئروریست فارس مۆجاهیدلری و تئروریست کۇرد قۇروپلاری ایله ایش بیرلیگینه گیریرلر، میلّی شُعارلاریمیزی دَییشیب، فارس و کۇرد لَهینه چئویریرلر. آزربایجان اوْیاق دیر، کیملیگینه دایاق دیر؛ شُعارینی... خامنئه ییه، کۇردیستانا، فارسیستانا دایاق دیر کیمی دئیه، تحریف ائدیب و میلّتی مئیدانلاردان قاچیرماغا سبب اوْلوبلار.

خوْشبختلیکله اؤنده گئدن میلّتچیلر، اؤن جبهه‌ده(خطّی مقدّمده) اوْلان فداکار قهرمانلاریمیز هئچ واخت مئیدانی بوْش قوْیمادیلار. اوْ نئچه نفر پارازیتلرین فیتنه‌‌سینی نۆطفه‌ده بوْغدولار. آزربایجان میلّی حرکتی‌نین مۆستقیل تۇتومونو و مۆباریزه‌سینی مئیدانلاردا مؤحکم قۇرودولار.

عزیز هموتنلر

اؤنوموزده‌کی 25 شهریور ۱۴۰۲/سئپتئمبئرین 16 سینا مۆختلیف فارس قۇروپلاری طرفیندن اوْ ج‍ۆمله‌دن سلطنت-طلب، رضا پهلوی و باشقا ضدّ تۆرکلر خاریجدن، داخیله چاغیریش وئریبلر. سۇال بۇدورکی: 

آزربایجان میلّی حرکتی‌نین بو چاغریشلار لا ایلگیلی تۇتومو نه اوْلمالیدیر؟

بو سۇالین جاوابیندا بیر میلّی سیاسی فعّال کیمی دئمه‌لی‌یم کی: بیز کئچن آجی تجروبه‌لری نظره آلاراق، فارس فاشیست اوْپوزیسییونون چاغیریشینا قوْشولمامالی‌ییق!

 بیز اؤزگه چیراغینا یاغ اوْلمامالی‌ییق!

یئتر!

بیز اؤز شهیدلریمیزین ایل دؤنمونده، شهید حدیث نجفی، دؤکتور آیلار حقی، اسرا پناهی، نسیم و ساییر شهیدلریمیزین عزیزله مه مراسیملرینده ایشتیراک ائتمه‌لی‌ییک. 

میلّتیمیز باجاردیغی قدر مئیدانلاردا اوْلمالیدیر. اؤز میلّی شُعارلاریمیزی اؤز آنا دیلیمیزده سسلندیرمه‌لی‌ییک. 

آزادلیق، عدالت، میلّی حؤکومت.

رد اوْلسون دیکتاتور!

رد اوْلسون فاشیزم!

یاشاسین آزربایجان!

اومود  دوْزگوْن

۲۲ شهریور ۱۴۰۲