کیملر میللی حرکتی غئیری سیاسی لشدیرمک ایسته‌ ییرلر؟

اومود  دوزگون

ایران فارس فاشیست سیستئمینده آزربایجان تۆرک اوُشاغی‌نین لهجه درمان ائتمه ویدئوسونون اوْرتایا چیخماسی تصادوفی بیر حادثه دئییل. بو فئنومئن یئنی ده دئییل؛ بونون اۇزون تاریخی وار دیر. میللی حرکتی غئیری سیاسیلشدیرمک پروژه‌سی ۷۵ ایل اؤنجه‌دن باشلانیبدیر.

بوتون لوکده سیاسی و دئموکراتیک بیر دؤولتچیلیگیمیز یالنیز میللی حؤکومت ایدی. او دؤلت ییخیلاندان سوْنرا و شهید پیشه‌ورینین ده اوْلدورولدویوندن سوْنرا، توده  حیزبی آزربایجان دمکرات فیرقه سینی اؤز کوْنترولو آلتینا آلیر. چئشیدلی یوْللارلا گۆنئی آزربایجاندا میللی حرکتی دایاندیرماغا چالیشیر. اؤنجه فارس فاشیست اوْردوسونون 25 - ۳۰ مین گۆناهسیز آزربایجانلینی قتل عامینی و وطنیمیزین ایشغال ائدیلمه‌سینی اؤرت-باستیر ائتدیلر. سوْنرا بو ایکی شۆعاری: 

«ستم ملی و رفع تبعیض»-ی اوْرتایا آتماقلا گۇنئی آزربایجاندا میللی حرکتی غئیری سیاسیلشدیرمک‌له کۇلتورل مسئله‌یه چئویرمه‌یه چالیشدیلار.

کئچن 34 ایلده یئنی میللی حرکتی‌نین ایچینه سیزان توْده حزبی له فدایی‌لرین قالینتیلاری عینی اۇیدوروجو «ستم ملی و رفع تبعیض» شۆعاری لا مشغول دورلار.

دیل مسئله‌سینه گلدیکده، ائله همن آداملار چالیشیبلار، دیل مسئله‌سینی غئیری سیاسیلشدیرسینلر. اوْشاق حقوقو ایله اوْشاق پسیخولوژی سوییه‌سینده محدودلاشدیرما و هر بیر اؤلکه‌ده اوْلدوغو نوْرمال بیر خسته‌لیک کیمی یاناشماق! و سایره... حالبوکی دیل مسئله سی و تورک دیلیمیزین آزاد قولانماسی، ایران آدلی اولکه ده تامامیله بیر سیاسی مسئله‌ دیر.

البته بو عیرقچی و تحقیر ائدیجی سوژئتلر بیرینجی دفعه دئییل؛ کئچمیش دؤرلرلده ده چئشیدلی آدلارلا: « لهجه‌سیز موعلیم‌لر، ۳-۴ یاشلی تۆرک اوْشاقلاریلا فارس دیلی یئترلیلیگی‌ سیناغیندان کئچیریلمه‌سی» (تست بسندگی فارسی) ائله‌جه ده سانال اورتاملاردا : «تک دیللی‌لی-یه یوْخ» (نه به تک زبانی) آنا دیلینی اؤیرنمک یا آنا دیلینده اؤیرتیم گورمک» (آموزش زبان مادری یا آموزش بزبان مادری) سفسسطه بازلیق لاری و..." آز اولماییب. غئیری سیاسیلشتیرمه تکجه دیل مسئله‌سینده دئییل، بۆتؤولوکده اۇرمو گۆلونون اؤلدورولمه‌سی، یئر آلتی و یئر اۆستو ثروتلریمیزین تالان اوْلماسی و سایر فلاکتلره ده شامیلدیر.

آیدیندیر کی، بونلارین هامیسی نین آماجی بیردیر؛ اوْ دا میللی حرکتی غئیری سیاسیلشدیرمک دیر. البته هئچ فرق ائتمز بو ایشی رئژیم گؤره یا بیزیم آسیمیله اوْلموشلار ویا ساتقینلار. 

تاکتیکی اوْلاراق، میللی سیاسی سؤیلمین جایدیریلماسینا و اۇیدورولماسینا یوْل وئرمک ده هامیمیزین قصوری اولوب و یئتری قدر میللی مستقیل سؤیلمی قورویا بیلمه میشیک. بو یوْلدا جیددی یاناشمامیز گره کیر. بوتون صادق میللی- سیاسی فعاللار مسئولیت داشیمالی و داها دیقتلی اوْلمالیدیرلار.

اعتراف ائتمه لیییک کی، تئوری ساحه‌سینده یئتری قدر ایشله‌ یه بیلمه میشیک و ساغلام ملی دوشونجه و تئوریلری میللتیمیزه چاتدیرا بیلمه میشیک. بو ضعیف لیگی‌ بعضی سویداشلاریمیزین سطحی آنالیزلرینده گوروروک. 

نظرده آلمالییق کی، گونئی آزربایجان میللی حرکتینی غئیری سیاسی لشدیرمه ده، فرقلی میقیاسدا بو ۳ مرکزینده رولو اولوب، ینه ده دا واردی: تهران- آنکارا- باکی!

۱۴-ابان- ۱۴۰۲